പോപ്പ് ഗായിക റിയാനയുടെ വീടിന് നേരെ വെടിവെപ്പ്: ഒരു സ്ത്രീ പോലീസ് കസ്റ്റഡിയിൽ

ലോസ് ഏഞ്ചൽസ്: പ്രശസ്ത പോപ്പ് ഗായിക റിയാനയുടെ ബെവർലി ഹിൽസിലെ വീടിന് നേരെ വെടിവെപ്പുണ്ടായതായി പോലീസ് അറിയിച്ചു. ഞായറാഴ്ച പ്രാദേശിക സമയം ഉച്ചയ്ക്ക് 1:15-ഓടെയാണ് (21:15 GMT) സംഭവം നടന്നത്. ലോസ് ഏഞ്ചൽസ് പോലീസ് ഡിപ്പാർട്ട്‌മെന്റിലെ ഉദ്യോഗസ്ഥർ സംഭവസ്ഥലത്തെത്തി പരിശോധന നടത്തുകയും തുടർന്ന് പ്രതിയെന്ന് സംശയിക്കുന്ന സ്ത്രീയെ കസ്റ്റഡിയിലെടുക്കുകയും ചെയ്തു. അക്രമം നടക്കുമ്പോൾ റിയാന തന്റെ ആഡംബര വസതിയിൽ ഉണ്ടായിരുന്നുവെന്ന് ലോസ് ഏഞ്ചൽസ് ടൈംസ് റിപ്പോർട്ട് ചെയ്തു. എന്നാൽ സംഭവത്തിൽ ആർക്കും പരിക്കേറ്റിട്ടില്ല എന്നത് വലിയ ആശ്വാസമായി.

മുപ്പതു വയസ്സ്  പ്രായമുള്ള ഒരു സ്ത്രീ കാറിൽ വസതിക്ക് മുന്നിലെത്തുകയും തന്റെ കൈവശമുണ്ടായിരുന്ന തോക്കുപയോഗിച്ച് ഏഴ് റൗണ്ട് വെടിവെക്കുകയുമായിരുന്നു എന്ന് പോലീസ് പറഞ്ഞു. സംഭവസ്ഥലത്ത് നിന്ന് അസാൾട്ട് റൈഫിളിന്റെ തിരകൾ കണ്ടെടുത്തിട്ടുണ്ട്. വെടിവെപ്പിന് ശേഷം കാറിൽ രക്ഷപ്പെട്ട പ്രതിയെ എട്ട് മൈൽ (12 കിലോമീറ്റർ) അകലെ നിന്നാണ് പോലീസ് പിടികൂടിയത്. ഇവരെക്കുറിച്ചുള്ള കൂടുതൽ വിവരങ്ങൾ അധികൃതർ പുറത്തുവിട്ടിട്ടില്ല.

കഴിഞ്ഞ കുറച്ചു കാലങ്ങളായി വാർത്തകളിൽ നിറഞ്ഞുനിൽക്കുകയാണ് റിയാനയും പങ്കാളി എസാപ് റോക്കിയും. കഴിഞ്ഞ സെപ്റ്റംബറിലാണ് ഇവർക്ക് മൂന്നാമത്തെ കുഞ്ഞ് (പെൺകുട്ടി) ജനിച്ചത്. റയറ്റ്, ആർസെഡ്എ എന്നീ രണ്ട് ആൺമക്കൾ കൂടി ഇവർക്കുണ്ട്. 2025 ഫെബ്രുവരിയിൽ, ഒരു മുൻ സുഹൃത്തിനെ വെടിവെച്ചെന്ന കേസിൽ എസാപ് റോക്കിയെ കോടതി കുറ്റവിമുക്തനാക്കിയിരുന്നു. ഈ വിചാരണ വേളയിൽ റിയാന തന്റെ മക്കളെയും കോടതിയിൽ എത്തിച്ചത് വലിയ വാർത്തയായിരുന്നു.

ബാർബഡോസിൽ ജനിച്ച റോബിൻ ഫെന്റി എന്ന റിയാന, 2000-ങ്ങളുടെ തുടക്കത്തിലാണ് സംഗീത ലോകത്ത് തരംഗമായത്. 'Pon de Replay', 'Umbrella' തുടങ്ങിയ ഹിറ്റുകളിലൂടെ ലോകപ്രശസ്തയായ താരം തന്റെ ആദ്യ ആൽബത്തിന്റെ 20-ാം വാർഷികം അടുത്തിടെയാണ് ആഘോഷിച്ചത്. സംഗീതത്തിന് പുറമെ, 'ഫെന്റി ബ്യൂട്ടി' എന്ന മേക്കപ്പ് ബ്രാൻഡിലൂടെയും ലിഞ്ചറി കമ്പനിയിലൂടെയും വൻ ബിസിനസ് സാമ്രാജ്യം തന്നെ അവർ കെട്ടിപ്പടുത്തു. 37-കാരിയായ റിയാനയ്ക്ക് നിലവിൽ ഒരു ബില്യൺ ഡോളറിലധികം ആസ്തിയുണ്ടെന്നാണ് ഫോർബ്സിന്റെ കണക്കുകൾ സൂചിപ്പിക്കുന്നത്.