തിയേറ്ററിൽ ഇറങ്ങും മുൻപ് ആട് 3 ക്ക് ഒരു രണ്ടാം ഭാഗം പ്രഖ്യാപിച്ച് സംവിധായാകാൻ മിഥുൻ മാനുവൽ തോമസ്

മലയാളികൾ ആവേശത്തോടെ കാത്തിരിക്കുന്ന 'ആട് 3' സിനിമയെക്കുറിച്ചുള്ള പുതിയ വെളിപ്പെടുത്തലുമായി സംവിധായകൻ മിഥുൻ മാനുവൽ തോമസ് രംഗത്ത്. ചിത്രം ത്രിഡിയിൽ നിർമ്മിക്കാമെന്ന ആശയം ആദ്യമായി തന്നോട് പങ്കുവെച്ചത് നടൻ സൈജു കുറുപ്പാണെന്ന് മിഥുൻ പറഞ്ഞു. ഷാജി പാപ്പനും സംഘവും അവതരിപ്പിക്കുന്ന സാഹസികതകൾ ത്രിഡിയിൽ അവതരിപ്പിക്കുന്നത് പ്രേക്ഷകർക്ക് പുത്തൻ അനുഭവമായിരിക്കുമെന്ന ചിന്തയിലാണ് ഇത്തരമൊരു പ്ലാനിലേക്ക് അണിയറപ്രവർത്തകർ എത്തിയത്. മിഥുൻ മാനുവലിന്റെ തന്നെ വാക്കുകളിൽ പറഞ്ഞാൽ, സൈജു കുറുപ്പിന്റെ ആ വലിയ താല്പര്യമാണ് ഈ ബിഗ് ബജറ്റ് ചിത്രത്തിന്റെ സാങ്കേതിക വശങ്ങളിൽ ഇത്രത്തോളം മാറ്റങ്ങൾ കൊണ്ടുവരാൻ പ്രേരിപ്പിച്ചത്. ഫാന്റസി ഘടകങ്ങൾക്ക് മുൻഗണന നൽകുന്ന ചിത്രമായതിനാൽ ത്രിഡി സാങ്കേതികവിദ്യ സിനിമയ്ക്ക് കൂടുതൽ കരുത്ത് പകരുമെന്നാണ് അണിയറപ്രവർത്തകരുടെ വിലയിരുത്തൽ.

സിനിമയുടെ ആദ്യ ഭാഗമായ 'വൺ ലാസ്റ്റ് റൈഡ്' റിലീസിന് തയ്യാറെടുക്കുമ്പോൾ തന്നെ, ആരാധകർക്ക് ഇരട്ടി മധുരം നൽകുന്ന മറ്റൊരു വാർത്ത കൂടി സംവിധായകൻ പങ്കുവെച്ചു. 'ആട് 3' യുടെ രണ്ടാം ഭാഗത്തിന്റെ തിരക്കഥയും ഇതിനോടകം പൂർത്തിയായിക്കഴിഞ്ഞു എന്നാണ് മിഥുൻ മാനുവൽ തോമസ് സ്ഥിരീകരിച്ചിരിക്കുന്നത്. ഇതോടെ ഷാജി പാപ്പന്റെയും ടീമിന്റെയും അവിസ്മരണീയമായ യാത്രകൾ ഇനിയും തുടരുമെന്ന് ഉറപ്പായി. ഫ്രൈഡേ ഫിലിം ഹൗസും കാവ്യ ഫിലിം കമ്പനിയും ചേർന്നൊരുക്കുന്ന ഈ ചിത്രം മലയാള സിനിമയിലെ തന്നെ ഏറ്റവും വലിയ ഫ്രാഞ്ചൈസികളിലൊന്നായി മാറുകയാണ്. സെൻസറിങ് പൂർത്തിയാക്കി ക്ലീൻ 'U' സർട്ടിഫിക്കറ്റുമായി എത്തുന്ന ചിത്രം മാർച്ച് 19-ന് തിയേറ്ററുകളിൽ വൻ തരംഗമുണ്ടാക്കുമെന്ന പ്രതീക്ഷയിലാണ് സിനിമാ ലോകം.