വീണ്ടും വിവാദങ്ങളുടെ നടുവിൽ മലയാള സിനിമ. ലിസ്റ്റിൻ സ്റ്റീഫനെതിരെ തുറന്നടിച്ച് സാന്ദ്ര തോമസ്

മലയാള സിനിമയിലെ ഒരു പ്രമുഖ നടനെതിരെ നിർമ്മാതാവ് ലിസ്റ്റിൻ സ്റ്റീഫൻ നടത്തിയ പരാമർശവുമായി ബന്ധപ്പെട്ട വിവാദം കനക്കുകയാണ്. അതിനിടെ അത്തരത്തിൽ ഒരു പരമാർശം നടത്തിയ ലിസ്റ്റിൻ സ്റ്റീഫനെതിരെ അതിരൂക്ഷ വിമർശനവുമായി രംഗത്തെത്തിയിരിക്കുകയാണ് നടിയും നിർമ്മാതാവുമായ സാന്ദ്ര തോമസ്.

മലയാള സിനിമയിലെ ഒരു പ്രമുഖ നടൻ ഒരു വലിയ തെറ്റിലേക്ക് പോയെന്നും അതിലൂടെ ഒരു മലപ്പടക്കത്തിനാണ് അത് തിരികൊളുത്തിയിട്ടുള്ളതെന്നും ആ തെറ്റ് തുടരരുതെന്നുമായിരുന്നു ലിസ്റ്റിൻ സ്റ്റീഫന്റെ പരാമർശം. എന്നാൽ നടന്റെ പേര് വ്യക്തമാക്കാതെയുള്ള ലിസ്റ്റിന്റെ പരാമർശം മുഴുവൻ നടന്മാരെയും സംശയത്തിന്റെ നിഴലിൽ നിർത്തിയിരിക്കുകയാണെന്നാണ് സാന്ദ്ര വിമർശിച്ചത്. തന്നെ സസ്‌പെൻഡ് ചെയ്യാം ആർജവം കാണിച്ച പ്രൊഡ്യൂസേഴ്സസ് അസോസിയേഷൻ നേതൃത്വം ലിസ്റ്റിൻ സ്റ്റീഫനെ പുറത്താക്കാനുള്ള ആർജ്ജവം കാണിക്കണം എന്നാണ് സാന്ദ്ര തോമസ് സോഷ്യൽ മീഡിയയിൽ പങ്കുവച്ച കുറിപ്പി ലൂടെ ആവശ്യപ്പെട്ടത്. സാന്ദ്ര തോമസ് സോഷ്യൽ മീഡിയയിൽ പങ്കുവച്ച കുറിപ്പ് ഇങ്ങനെ.

ഫിലിം പ്രൊഡ്യൂസേഴ്‌സ് അസോസിയേഷൻ ഭാരവാഹിക്കും അസോസിയേഷനിൽ വിശ്വാസമില്ലാതായോ?

സിനിമ സംഘടനകളുടെ ഉദ്ദേശലക്ഷ്യങ്ങളിൽ പ്രധാനം സിനമക്കകത്തുണ്ടാകുന്ന പ്രശ്നങ്ങളെ രമ്യതയിൽ പരിഹരിക്കുക എന്നുള്ളതാണ്. എന്നാൽ ഇന്നലെ ഒരു പൊതുവേദിയിൽ വെച്ച് പ്രൊഡ്യൂസഴ്സ് അസോസിയേഷൻ ഭാരവാഹികൂടിയായ ലിസ്റ്റിൻ സ്റ്റീഫൻ പരസ്യമായി മലയാള സിനിമയിലെ നടന്മാരെയാകെ സംശയത്തിന്റെറെ നിഴലിൽ നിർത്തിക്കൊണ്ട് നടത്തിയ പ്രസ്‌താവന അനുചിതവും സംഘടനാചട്ടങ്ങൾക്ക് വിരുദ്ധവുമാണ്.മലയാളസിനിമക്ക് ദോഷം ചെയ്യുന്ന ഇത്തരം പ്രസ്താവനകൾ നടത്തുന്ന ലിസ്റ്റിൻ സ്റ്റീഫനെ അടിയന്തിരമായി പ്രൊഡ്യൂസഴ്സ് അസോസിയേഷൻ്റെ ഭാരവാഹിത്വത്തിൽ നിന്ന് മാത്രമല്ല പ്രാഥമിക അംഗത്വത്തിൽ നിന്നും പുറത്താക്കണം.

എനിക്കുണ്ടായ വ്യക്തിപരമായ വിഷയത്തിൽ രാജ്യത്തു നിലനിൽക്കുന്ന നിയമങ്ങൾക്ക് വിധേയമായി ഞാൻ മുന്നോട്ട് പോയപ്പോൾ എന്നെ സസ്പെൻഡ് ചെയ്യാൻ കാണിച്ച (കോടതിയിൽ നിലനിന്നില്ല എങ്കിൽപ്പോലും ) പ്രൊഡ്യൂസേഴ്സസ് അസോസിയേഷൻ നേതൃത്വം ലിസ്റ്റിൻ സ്റ്റീഫനെ പുറത്താക്കാനുള്ള ആർജ്ജവം കാണിക്കണം. കൂടാതെ ഉന്നതബോഡി എന്ന നിലയിൽ കേരളാ ഫിലിം ചേംബർ സ്വമേധയാ ഈ വിഷയത്തിൽ ഇടപെട്ട് ഉചിതമായ നടപടികൾ സ്വീകരിക്കണമെന്ന് ഞാൻ അഭ്യർത്ഥിക്കുന്നു.

"മലയാളസിനിമയിൽ വന്നിട്ട് പത്ത് പതിനഞ്ച് വർഷമായി. കുറെയധികം സിനിമകളും ചെയ്തിട്ടുണ്ട്. പക്ഷേ മലയാള സിനിമയിലെ പ്രമുഖനടൻ വലിയ തെറ്റിലേക്ക് ഇന്നു തിരികൊളുത്തിയിട്ടുണ്ട്. വലിയൊരു മാലപ്പടക്കത്തിനാണ് തിരികൊളുത്തിയത്. അത് വേണ്ടായിരുന്നു. ഞാൻ പറയുമ്പോൾ ആ നടൻ ഇത് കാണും. പക്ഷേ ആ നടൻ ചെയ്തത് വലിയ തെറ്റാണ് എന്ന് ഓർമിപ്പിക്കുകയാണ്. ഇനിയും ആ തെറ്റ് തുടരരുത്, ആവർത്തിക്കരുത്. കാരണം, അങ്ങനെ തുടർന്നു കഴിഞ്ഞാൽ അത് വലിയ പ്രശ്നങ്ങൾക്കും കാരണമാകും."- ലിസ്റ്റിന്റെ ഈ വാക്കുകളാണ് ഇപ്പോൾ വിവാദമായിരിക്കുന്നത്.

ദിലീപിന്റെ 150 ആമത്തെ ചിത്രമായ പ്രിന്‍സ് ആന്‍ഡ് ഫാമിലി എന്ന സിനിമയുടെ പ്രൊമോഷൻ പരിപാടിക്കിടെയാണ് പരിപാടിക്കിടെയാണ് ലിസ്റ്റിൻ സ്റ്റീഫൻ മലയാള സിനിമയിലെ നടനെതിരായ പരാമർശം ഉന്നയിച്ചത്.