'ഛോട്ടാ മുംബൈ രണ്ടാം ഭാഗം ഉണ്ടാകില്ല, പക്ഷേ, ആ മൂഡ് ഉള്ള മറ്റൊരു സിനിമ ചെയ്യണമെന്ന് ആഗ്രഹമുണ്ട്':- ബെന്നി പി നായരമ്പലം

മലയാളത്തിൽ ഒരുപാട് ഹിറ്റ് സിനിമകൾക്ക് തിരക്കഥ സമ്മാനിച്ച തിരക്കഥാകൃത്താണ് ബെന്നി പി നായരമ്പലം. ഫസ്റ്റ് ബെൽ എന്ന സിനിമയ്ക്ക് വേണ്ടി തിരക്കഥ എഴുതി തുടങ്ങി കുഞ്ഞിക്കൂനൻ, ചാന്ത്‌പൊട്ട് തുടങ്ങിയ ദിലീപ് ചിത്രങ്ങളുടെ തിരക്കഥയും ഇദ്ദേഹമാണ് എഴുതിയത്.

മോഹൻലാലിന്റെ ഹിറ്റ് ചിത്രങ്ങളിൽ ഒന്നായ ചോട്ടാ മുംബൈയുടെ തിരക്കഥ ബെന്നി പി നായരമ്പലാമാണ്‌ തയ്യാറക്കിയത്. ചിത്രം വീണ്ടും റീ റിലീസിനെത്തി വമ്പൻ കളക്ഷൻ നേടിയിരിക്കുകയാണ്. ചിത്രത്തിന്റെ രണ്ടാം ഭാഗത്തിനായി കൊതിക്കുന്ന ആരാധകർ ഉണ്ട്. എന്നാൽ അങ്ങനൊന്ന് ഉണ്ടാകില്ലെന്നാണ് ബെന്നി പി നായരമ്പലം വ്യക്തമാക്കുന്നത്. എന്നാൽ അതുപോലെ തമാശ ഉൾകൊള്ളുന്ന ഒരു ചിത്രം ചെയ്യാൻ ആഗ്രഹം ഉണ്ടെന്ന് അദ്ദേഹം പറയുന്നു. ഒരു സ്വകാര്യ ചാനലിന് നൽകിയ അഭിമുഖത്തിലാണ് അദ്ദേഹം ഇക്കാര്യങ്ങൾ പറഞ്ഞത്.

‘ഒരുപാട് സിനിമകളുടെ രണ്ടാം ഭാഗത്തിന് സ്‌കോപ്പുണ്ടെന്ന് പറഞ്ഞിട്ട് ആളുകള്‍ ഫേസ്ബുക്കിലും മറ്റും എഴുതുന്നത് ഞാന്‍ ശ്രദ്ധിക്കാറുണ്ട്. പക്ഷെ രണ്ടാം ഭാഗമെന്നത് വളരെ റിസ്‌ക്കാണ്. ഇപ്പോള്‍ ഛോട്ടാ മുംബൈ വളരെയേറെ ആഘോഷിക്കപെടുന്നുണ്ടല്ലോ. ഇതിന്റെ രണ്ടാം ഭാഗത്തെ കുറിച്ച് പലരും പറയുന്നത് കേള്‍ക്കാം. അങ്ങനെയൊരു സിനിമ വരുന്നത് ആലോചിച്ചു നോക്കൂ.

ആ സിനിമയില്‍ പ്രധാന കഥാപാത്രങ്ങള്‍ ചെയ്തവരില്‍ പലരും ഇന്നില്ല. അന്നത്തെ ലാലേട്ടന്റെ പ്രായമല്ല ഇന്നത്തെ ലാലേട്ടന്. 18 വര്‍ഷത്തെ വ്യത്യാസമുണ്ട്. ലാലേട്ടന്റെ രൂപമെല്ലാം മാറിയിട്ടുണ്ട്. ഇപ്പോള്‍ അദ്ദേഹത്തിന്റെ കുട്ടിത്തം മാറി, പക്വത വന്നിട്ടുണ്ട്. അദ്ദേഹത്തിന്റെ ഇപ്പോഴുള്ള ബോഡി നല്ല ഫിറ്റാണ്. മുമ്പ് ചെയ്ത കഥാപാത്രത്തെ നിലനിര്‍ത്തിയിട്ട് വേണ്ടേ അതിനെ വീണ്ടും ചെയ്യാന്‍. ഛോട്ടാ മുംബൈ രണ്ടാം ഭാഗം ചെയ്യണമെങ്കില്‍ ആ പടം റിലീസായിട്ട് രണ്ട് വര്‍ഷത്തിന് ശേഷം തന്നെ ചെയ്യണമായിരുന്നു.

അങ്ങനെ വന്നിരുന്നെങ്കില്‍ ആ ഫ്‌ളേവറില്‍ തന്നെ പിടിക്കാമായിരുന്നു. പക്ഷെ ഇവരെ വെച്ചിട്ട് ആ മൂഡ് ഉള്ള മറ്റൊരു സിനിമ ചെയ്യണമെന്ന് എനിക്ക് ആഗ്രഹമുണ്ട്. അത് ഞാന്‍ ആലോചിക്കുന്നുണ്ട്. ഛോട്ടാ മുംബൈയുടെ ആ ട്രെന്‍ഡിലുള്ള സിനിമയാണ് ഉദ്ദേശിക്കുന്നത്. അതുപോലെയുള്ള പാട്ടും ഡാന്‍സുമൊക്കെ ഉള്ള പരിപാടി ആലോചിക്കുന്നുണ്ട്. നടക്കുമോയെന്ന് അറിയില്ല. അന്‍വറുമായി ചര്‍ച്ച നടത്തിയിട്ടുണ്ട്,’ ബെന്നി പി. നായരമ്പലം പറഞ്ഞു